Għaliex għandna bżonn l-euro diġitali?
L-euro diġitali, flimkien mal-flus kontanti, jippreserva l-libertà tan-nies li jagħżlu kif iħallsu.
Il-mod kif in-nies iħallsu qed jinbidel malajr: aktar minn nofs il-pagamenti kollha tax-xiri bl-imnut issa huma diġitali u x-xiri online qed jiżdied. L-euro diġitali joffri mod ġdid ta’ ħlas, li jagħti lil kulħadd fiż-żona tal-euro l-għażla li juża l-flus tal-bank ċentrali kemm f’forma fiżika kif ukoll f’forma diġitali.
Billi jikkomplementa l-flus kontanti, l-euro diġitali jagħmel il-flus tal-bank ċentrali disponibbli għall-pagamenti, u b’hekk l-euro jidħol fl-era diġitali. Dan jappoġġa l-inklużjoni finanzjarja, jipproteġi l-privatezza, u jagħmel il-pagamenti aktar faċli u aktar siguri għal kulħadd. Din hija r-raġuni għaliex qed inħejju teknikament għall-possibbiltà li jinħareġ l-euro diġitali ladarba tkun ġiet adottata l-leġiżlazzjoni rilevanti.
Fl-istess ħin, aħna nibqgħu impenjati li niżguraw li l-flus kontanti jibqgħu jiġu aċċettati kullimkien fiż-żona tal-euro wkoll.
Xi jfisser għalik l-euro diġitali – u għaż-żona tal-euro?
L-euro diġitali huwa mfassal biex jissodisfa l-ħtiġijiet li qed jinbidlu tan-nies, tan-negozji u tal-ekonomija – din hija r-raġuni għaliex huwa importanti.
L-evoluzzjoni tal-flus
Ħafna aspetti ta’ ħajjitna qed isiru diġitalizzati, u l-flus mhumiex differenti. Il-flus kontanti se jkomplu jkunu alternattiva ta’ ħlas; mhux se jiġu ssostitwiti. Fl-istess ħin, sabiex jiġi żgurat li l-munita tagħna tibqa’ valida għall-futur, jeħtieġ li tevolvi skont kif in-nies jippreferu jħallsu. B’mod simili għall-flus kontanti llum, l-euro diġitali jġib l-inklużività u l-privatezza fl-era diġitali.
Nagħmlu ħajjitna aktar faċli
L-euro diġitali jagħmel ħajjitna aktar faċli billi jagħtina l-għażla li nħallsu b’mezz ta’ pagament sigur li huwa aċċettat universalment fiż-żona tal-euro kollha. Bħall-flus kontanti, il-ħlas b’euro diġitali jkun bla tariffi għal kulħadd fiż-żona tal-euro.
Ewropa aktar b’saħħitha
L-euro diġitali jagħmel iż-żona tal-euro aktar robusta. Dan inaqqas id-dipendenza taż-żona tal-euro fuq fornituri mhux Ewropej, jgħin biex jgħaqqad ix-xenarju frammentat tal-pagamenti, u jappoġġa l-innovazzjoni u l-kompetizzjoni. L-euro diġitali huwa mfassal biex jagħti lil kulħadd fiż-żona tal-euro aċċess għal opzjoni ta’ pagament diġitali pubblika sigura, reżiljenti – appoġġata mill-BĊE u disponibbli flimkien mal-flus kontanti.
X’inhuma l-flus tal-bank ċentrali — u għaliex huma importanti?
X'inhuma l-flus tal-bank ċentrali?
Il-flus li noħolqu aħna fil-BĊE jissejħu flus tal-bank ċentrali. Il-flus kontanti fil-kartiera jew fil-portmoni tiegħek huma flus tal-bank ċentrali. Fil-fatt, il-karti tal-flus u l-muniti bħalissa huma l-uniku tip ta’ flus tal-bank ċentrali disponibbli għall-pubbliku. Il-flus tal-bank ċentrali jissejħu wkoll flus pubbliċi għaliex jinħarġu minn istituzzjoni pubblika – il-bank ċentrali – u għalhekk huma sostnuti mill-settur pubbliku fiż-żona tal-euro
X’inhuma l-flus?
Meta bank jagħtik self u l-flus jidhru fil-kont tiegħek, dawn huma flus privati. Il-bilanċ u t-tfaddil tal-kont bankarju tiegħek huma flus privati. U meta tħallas b’kard jew online, qed tuża wkoll il-flus li ħoloq il-bank tiegħek. Fil-fatt, illum, il-biċċa l-kbira tal-pagamenti elettroniċi fiż-żona tal-euro huma fi flus privati.
L-euro diġitali: inaqqas id-distakk
Illum, in-nies m’għandhomx aċċess għall-flus tal-bank ċentrali f’forma diġitali. Aħna nimmiraw li nikkombinaw l-affidabbiltà tal-flus tal-bank ċentrali mal-konvenjenza tal-pagamenti diġitali. Dan jipprovdi lin-nies fiż-żona tal-euro bi flus pubbliċi f’forma elettronika, minbarra l-flus kontanti. Il-mod kif isir dan huwa munita diġitali tal-bank ċentrali: l-euro diġitali.